【30歲創業家的一週】為何我開始拍Vlog,而你都應該試下?

💡 點解我拍咗第一條創業vlog？

一直以嚟，我都係拍教學內容為主，例如Digital Marketing策略、社群經營技巧等。但最近，我決定試下拍vlog，記錄自己一週嘅創業生活。唔係因為想轉型做KOL，而係我發現：

香港幾乎冇乜創業人拍vlog，尤其係生活化、真實呈現創業過程嘅內容。

市面上有嘅YouTube頻道，大致分兩類：

1. 🎥「內容創作者型」：呢類人通常係因為影片紅咗、有咗流量，先開始接sponsor、賣周邊、甚至搞副業。但佢哋一開始唔係為咗做生意拍片，而係拍片本身。

2. 🏢「公司帳戶型」：通常將YouTube當Google Drive，upload一啲廣告影片，但冇真正經營頻道，冇諗過觀眾係邊個、想睇咩、會點樣互動。

但我覺得，有第三條路可以行。

🎯 創業人應該拍片，因為你做緊嘅嘢，本身就有內容

我一直覺得，創業人係最適合做內容創作嘅一群人：

• 你每日都面對唔同挑戰：人事、資金、決策、Marketing、Sales...

• 你有真實經驗可以分享，而唔係抄書

• 你唔需要搵題材，因為你嘅生活就係題材

而觀眾，其實都想睇「一個真實做緊生意嘅人，點樣諗、點樣做、點樣行出每一步」。

唔一定要教學式；記錄式都可以有價值，尤其係呈現你點樣決定、點樣應對、點樣失敗再企返起身。

🌟 一個我欣賞嘅例子：Bowtie

香港有一間公司，我覺得係YouTube經營得幾好：Bowtie，虛擬保險公司。佢哋唔單止係賣保險，而係用影片講解產品背後嘅邏輯、保險知識，甚至拍片講創業思維。

佢哋唔係靠viral搞笑吸流量，而係用內容教育市場、建立信任。呢個方向，我覺得值得更多創業人參考。

🎬 拍Vlog，其實係建立個人品牌嘅一部分

而家係一個「人先於品牌」嘅年代。人哋唔係先相信你個產品，而係先相信你呢個人。

你係點樣諗嘢？
你面對困難會點樣處理？
你對行業有咩睇法？
你點樣對待團隊、客戶、社群？

這啲問題，文字未必講得晒，但影片可以。你唔需要做戲，只需要做返真實嘅自己，就已經係最有感染力嘅內容。

📌 行動方案：如果你係創業人，又想試下拍vlog，可以由呢幾步開始：

1. 選一個你一週內準備做嘅項目，例如launch一個campaign、開會、做pitch，記錄過程。

2. 唔好諗拍得幾靚，諗內容本身有冇意思。真實比完美更有力量。

3. 喺片尾加一個Reflection：你學到咩？下次會點做？觀眾會更容易投入同共鳴。

💬 想問你一個問題：

如果你都係創業人，你認為你嘅日常，有冇值得分享俾人睇嘅地方？你會唔會願意試下用vlog做第一步？

PS 如果你都係創業人，想搵一班一齊交流、成長嘅人，歡迎加入我哋嘅社群 DOT CLUB！

Ariel 🙂 

Follow us on Instagram:
Dot Club | Planty Lab | Ariel Leung

如果你認為呢類型嘅內容對你有幫助，不妨分享俾三個你重視嘅朋友！